Aglinglingay Kadagitoy nga Online Radio

Ni mc rasing

Aglinglingay kadagitoy nga Online Radio

Malagipko daydi inangmi a baket—nagagaet agdengngeg iti radio. No kasta nga agaayamkami nga ubbing iti agsapa wenno iti rumabii, kadawyan a mangngegmi dagiti drama iti radio. Agingga ita ket matandaanak pay met ni Doming-Doming mabalin amin. Uray da Baket Bitang ken Lakay Patti, iramanyo payen ni Lakay Bianong, ken sinno ngay ti makalipat iti Pagsarmingan?

Kas met kadawyan, nagbalinak a teenager, ket nagbaliw met dagiti kayatko a denggen. Gapu ta nadiskubre ta FM radio idi Grade-5-nak, siempre, nangrugi metten a Rivermaya kas kada Eraserheads ti kanayonko a denggen.

Gapu ta panawenen ti internet ita, kasla mapukpukaw metten ti essem dagiti agtutubo (ken uray pay dagiti dadduma a nataengan) nga agdengngeg iti istasion ti AM wenno FM iti radio. Kasla kaykayatda itan ti agbuya iti music videos iti YouTube. Mabalinmo met ngamin nga i-download dagiti video sadiay, ikabilmo iti mp3 player wenno iti smartphone-mo, mayaten.

Dagiti kakailiantayo nga adda iti ballasiw-taaw, mailiwda met kadagiti kankanta ken programa a naggapu ditoy pagiliantayo—nangruna dagiti naggapu iti kailokuan, di ketdin? Uray dakami nga adda ditoy siudad, awan met pagdengganmi iti Ilokano nga istasion piman.

Imbag ta adda dagitoy online radio. Basta konektadoka iti Internet, mabalinmo ti agdengngeg.

Dagitoy man dagiti nabirokanmi nga istasion a mabalintayo a pagdenggan iti programa ken kankanta nga Ilokano, Tagalog, uray Bisaya ket adda!

Eradioportal.com. Mapa-AM wenno FM, nagadu ti pagpiliam ditoy: Hot, Love, Big, Bombo, wenno aniaman kadagiti dadakkel nga istasion. No kayatmo ti agdenggeg iti istasion idiay Tuguegarao, Santiago, wenno Dagupan, adu ditoy. Mabalinmo pay ti ag-text iti kablaawmo ket basaenda on-air. Sigud nga adda Ilokano Internet Radio ditoy Eradioportal, im-blog pay daytoy ni Jake Ilac iti blog-na. Sinapulko daytoy nga istasion ngem daksanggasat ta saanen nga on-air.

Iluko.com. Adda online radio ti Iluko.com. Mapanka laeng itoy a link tapno mangngegmo dagiti musika sadiay: http://www.iluko.com:8081/Ilocano_Broadcast. Aluadam laeng nga ipigsa ta speaker ti laptop wenno kompiutermo ta amangan no agreklamo dagiti katrabahoam a di makaawat iti Ilokano.

PinoyConnection.PH. Saan nga Ilokano ti pagsasao daytoy nga online radio. Ngem no kayatmo ti mainspirar, nasayaat la unay ti agdengngeg iti daytoy nga istasion. Dagiti Overseas Filipino Workers (OFW) ti kangrunaan a target audience daytoy nga istasion—adda musika, adda dagiti programa a mangtratar iti karbengan ken kasasaad dagiti OFW. Proyekto daytoy ti Far East Broadcasting Company (FEBC).

Ngem no awan mabirokam nga Ilokano online radio, inka lattan a dita YouTube ket i-search-mo dagiti “Ilokano song playlist.” Mabalinmo nga i-download dagiti mabuybuyam dita YouTube ket pagbalinem pay nga mp3. Ala, ta dayta ti sumaruno a topiko ti Haytek!