Bulan, Bulan

Ni Roselyn C. Campano

Bulan, bulan, nagsilnagkan
Uray rabii, inkam makaay-ayam
Iti sampedro wenno linnemmengan
Ditoy nalawa a paraangan.

Bulan, bulan, saludsodek man
No mangmanganka, aniat’ sidsidam?
Ta nakuttongka idi kalman
Apay a nalukmegka met itan?

Bulan, bulan, nagngatoka man
Ta tangtangadendaka iti tangatang
Dita kadi ti naituding a pagariam
Tapno agserbika a silaw iti law-ang?

Bulan, bulan, pappapanam
Kadagiti rabii a dika agparparang?
Ti iranranudmo kadakami a rangrang
Pudno kadi a bulbulodem la’ng?

Naipablaak iti Bannawag Magazine, Agosto 11, 2014 a bilang