Dagiti Website a Pagsukisokan Para iti Thesis wenno Research Paper

ni mc rasing

Paset ti biag dagiti estudiante ti panagsukisok wenno panagresearch. Adda term paper, reaction paper, ken ti pagbutbutngan ti adu–ti thesis project!

Idi addaak iti kolehio, kanayonak idiay Main Library ti UP Diliman. Nagngangato dagiti shelf a napno iti libro. Makaay-ayo ti maturog… este, agsukisok ken agbasa, gayam. Ti narigat idi, masapulmi pay a sapulen dagiti libro babaen iti library cards. Sakbay a naggraduarak, imbag ta mabalinen ti agsukisok iti libro iti online databas ti library.

Nalaklaka itan ti agsukisok. No siak siguro ti kolehio ita, uray no saanakon a mapmapan iti library, kabaelak ti agsurat iti term paper wenno ania man nga assignment nga ited ti propesorko.

Uray met dagiti adda iti maikapat wenno maikalima a tawen iti haiskul, masapulda met ti agsukisok para kadagiti research paper-da. Mabalin a maipapan iti Mathematics, Physics, Economics, Political Science, wenno ania pay a sabjek ti papel a sursuratem, dagitoy man dagiti website a mabalinmo a konsultaren.

Wikipedia. Daytoy ti umuna iti listaak ta mayat a pangrugian ti Wikipedia gapu iti kinaadu ti impormasion a makalapmo. Ngem ballaagankayo a. Pangngaasiyo ta diyo ar-aramaten ti Wikipedia iti Reference wenno Bibliography-yo. Ulitek, diyo ar-aramaten daytoy a website a kas reference.

Katawaandakayo dagiti mamaestrayo ken mamulitan ti panagkitada iti sinuratyo. Kas koma tay maysa a doktorado a taga-DepEd a nakasentroan ti kontrobersya iti Ortograpia ti Pagsasao nga Ilokano iti nabiit laeng. Agasem ta inusarna ti Wikipedia a kas source iti reaksionna iti maysa a lektiur? Di man la ngata dinillaw dagiti Propesorna idi?

Amangan no masdaawka no apay a kwestionable ti Wikipedia. Kastoy ngamin, uray siasino, mabalinna nga i-edit ti aniaman nga adda iti Wikipedia.

Kastoy ti umno a panangusar iti Wikipedia: No nabasamon ti entry iti Wikipedia, mapanka iti baba ti website ket sapulem ti “References” ken “For Further Reading.” Dita a nailista dagiti libro, website, ken naduma-duma a ‘journal articles’ a mabalinmo nga usaren iti Bibliography ti papelmo.

Google Books ken Amazon.com. No mapanka iti http://books.google.com wenno http://Amazon.com mabalinmo met ag-search kadagiti liblibro a mainaig iti topiko ti thesis wenno term paper-mo. Kadagitoy a dua a website, mangipablaakda met iti libre a chapter wenno sumagmamano a chapter a mabalinmo a basaen tapno malawlawagan pay ti panunotmo maipapan iti topiko a sursuratem.

Mabalinmo pay a kitaen ti “Table of Contents” dagiti libro a mainaig iti topikom ket makitamon no ania dagiti naduma-duma a sub-topics ti topiko a sursuaratem.

Google Scholar. Malaksid iti liblibro, mayat pay ti agbasa ken agusar iti scholarly articles a kas references. Naipablaak dagitoy kadagiti “scholarly journals” a naglasat iti “peer review.” Kayatna sawen, studies ken articles dagitoy nga inarisit dagiti nasirib a propesor ken syentista sakbay a naipablaak. Inka kitaen dagiti sampol iti http://scholar.google.com. Mabasam dita dagiti Abstract dagitoy nga artikulo, ngem sagpaminsan, matsambaam met ti libre a kopia ti sumagmamano nga articles.

eJournals.ph. No kayatmo met dagiti ‘scholarly journal’ a naisurat ditoy Pilipinas, bisitaem ti http://eJournals.ph. Nupay adda bayadna daytoy no kayatmo nga i-download ti papel, mabalinmo metten a saludsoden iti library ti pagadalanyo no adda dagitoy a journal iti koleksionda.

Laglagipenyo laeng. Nupay adu dagitoy a mabalin a pagsukisokan, masapul a masursurom ti umno a panangdakamat wenno citation dagiti references-mo. No saan, a ket mabalin nga ibaga ti maestro wenno maestram a Plagriarism ti inaramidmo.

Immuna a naipablaak iti Bannawag Magazine, Hulyo 2014