Dua nga Apps a Masapulmo no Agbiahe ken Agmanehoka

Ni mc rasing

No adda smartphone-mo kailian, nalabit adun dagiti apps nga inyinstall-mo. Sapay la koma a ta saan met a puro Candy Crush, Temple Run, ken no ania pay dita a games dagiti apps-mo aya?

Uray no saanen a kalgaw, adda latta met dagiti taraddek ken managbiahe ta iti panawentayo ita, kanayon nga adu ti papanantayo. Mabalin nga agluganka iti bus wenno agmanehoka iti bukodmo a lugan. Kasano ngay no dimo ammo ti dalan a pagturongam wenno dayta ti umuna a daras a sarungkaram dayta a lugar?

Malagipko la ket ngarud idi napankami nagatendar iti Kur-it ken Kurditan idiay Vigan idi agtapos ti Abril 2014. Dinagasmi ti maysa a kaduami idiay Camiling, Tarlac. Tapno nadardaras ti panagbiahemi a mapan Vigan, nagdesisionkami a magna idiay Bayambang, sa agpa-San Fabian-kami idiay Pangasinan ket sumrekkaminto idiay Agoo, La Union.

Saanko a kabisado dayta a ruta. Narigat ketdi no adda interseksion a pagkilloanmi ket dumanonkami idiay Zambales imbes nga idiay Ilocos Sur.

Imbag la ketdin ta adda dagitoy dua nga apps iti Android smartphone-ko. Inton sumaruno nga agbiaheka kailian, ket dimo ammo no kasano mapan sadiay, padasem nga i-download dagitoy nga apps.

No bilang usarem dagitoy nga apps, siguradoem a naka-On ti Mobile data ti smartphone-mo, agraman ti GPS-na. No saanka a naka-Unlimited Internet Surfing iti network-mo, bantayam no kasano kabayag ti panangusarmo iti Mobile Data ta amangan no manginaanka met.

Google Maps. Maysa kadagiti produkto ti Google, Inc. daytoy. Ipakita ti Google Maps ti agdama nga ayanmo babaen iti asul a tulnek. No i-type-mo iti Search bar ti disso a papanam, kas koma iti Vigan, Ilocos Sur, ipakitana no mano kilometro ti kinaadayo ti papanam. Ipakitana pay dagiti ruta a mabalinmo a suroten.

Waze. Maysa pay kadagiti kaay-ayok nga usaren nga apps no agbiaheak daytoy Waze. Kasla Twitter wenno Facebook daytoy para kadagiti drayber. No linuktam daytoy nga app kabayatan nga agmanmanehoka, ipakitana dagiti mapagnaam a lugar nga adda trapikna. Makitam pay ketdi no adda nai-report nga aksidente kadagiti malabsam a lugar.

Babaen met laeng iti Waze, makitam pay ti average speed dagiti luglugan a magmagna met laeng iti dalan a pagnaam. Mabalinmo metten ti agsapul iti detour. Ti parikut laeng no saanmo a kabisado dagiti kalye a pagkilloam, amangan no nakarkaro la ketdi a mayaw-awanka.

Kabaelan dagitoy dua nga apps nga ipakita ti ayanmo iti mapa babaen iti teknolohiya ti GPS wenno Global Positioning System. Adu dagiti Satellites nga agliklikaw iti lubong. Usaren ti GPS ti tallo wenno nasursurok pay a satellites babaen iti proseso a maaw-awagan iti Triangulation. Ibato ti Google Maps ti signal ti smartphone-mo iti maysa a satellite. Kalkulaen met ti maysa a satellite ti posisionmo iti lubong babaen iti panangikomparana iti lokasionmo kadagiti dua wenno nasursurok pay a satellite, sa isublina ti signal iti smartphone-mo tapno makitam metten ti lokasionmo.

Inusarko dagitoy nga apps gapu ta daan a modelo ti luganko. Dagiti mairuruar a baro a modelo ti lugan ita, addan built-in a GPS-da. Agsao pay ketdi dagitoy a GPS ket ibagana no agkilloka iti kannawan wenno kannigid a kanto.

Ngem no addaka kadagiti kabambantayan ken awan signal ta smartphone-mo, awan mabalin, kapilitan nga agsapulka iti tao a pagdamagam no kasanoka makadanon iti papanam.

Immuna a naipablaak iti Bannawag Magazine, Agosto 2014