Kakadua iti Panagbaniaga

Ni Sheri Rea (Pennsylvania)

BASAEN Eclesiastes 4:9-12

“Ta no sadino ti yan ti dua wenno tallo nga aguummong gapu iti naganko, addaak kadakuada sadiay.” — Mateo 18:20

Natubayak iti nakristianoan a kaman, ngem saan unay nga agat-atendar iti simbaan ti familiak. Idi nagleppasak iti kolehiyo, nagsubliak iti ilimi ngem diakon nadanonan ti kaadduan kadagiti gagayyemko ta immakardan iti pagnaedan. Naldaanganak ta awanen am-ammok iti lugarmi, isut’ gapuna a nagbirokak iti iglesia tapno makasarakak iti baro a pagayam ken kalangen-langen.

Idi inrugik ti agatendar, naawisak nga agmiembro iti bassit a grupo nga agad-adal iti Biblia. Idi damo, agtukiad ti riknak ta awan a pulos am-ammok kadakuada, ngem gapu iti naanus a panangallukoy kaniak ti Dios, inaklonko ti awis ket nakipagadalak. Nariknak ti pannakabalbaliw ti biagko. Nasursurok nga ipateg ti padak a tao iti nasaysayaat a wagas. Agtitinnulong ti tunggal kameng ti grupo. Iti panawen a narigat ti biag, agsisinnaranaykami, ket makipagrag-okami met iti tunggal maysa. Daytoy a bassit a grupo ti biag ken kiredko iti adu a tawen.

Babaen iti daytoy a kapadasan, nautobko a saan nga ipalubos ti Dios nga agbiagtayo nga agmaymaysa. Ipakita ti Dios kadatayo ti ayatna babaen kadagiti gagayyem a kristiano. Inted ti Dios ti tunggal maysa kadatayo tapno agsisinnaranay, agiinnadal, ken kapatgan ti amin, agiinnayat.

Pannakaikonektar. Mangirugi iti bassit a grupo. No kasapulam ti tulong a mangbukel iti bassit a grupo ket aramatem ti Siled Ti Kararag, kitaem ti http://upperroom.org/devotional/smallgroup.asp.

Kararag: Sika O Apo a paggapuan ti pudno a rag-o, agyamankami iti familiami a nakristianoan ken iti ayat ken tulong nga ipaayda kadakami. Iti nagan ni Jesus. Amen.

* * * * *

Naadaw iti Siled ti Kararag: Tarabay iti Inaldaw a Panagdebosion, impablaak ti Discipleship Resources-Philippines. Ag-email iti drphilippines@gmail.com tapno maaddaan iti kopia ti Siled ti Kararag.