Kasano Aya ti Agaramid iti Blog?

Ni mc rasing

Amangan no kayatmo mangrugi iti blog-mo kailian? Nalaka laeng. Basta ammom ag-click ken agpindot iti Back button, kayang-kaya!

Sungbatam man la dagitoy a saludsod ta barbareng umadu pay dagiti Ilocano bloggers ditoy pagilian.

Ania ti panggepmo iti panangaramid iti blog?

Kayatmo laeng kadi nga isurat dagiti kapanunotam ken kapadasam iti biag? Kayatmo kadi ti agsurat iti bukodtayo a pagsasao? No nangisabmitka iti sinuratmo ket saan a naipablaak, amangan no kurang ti panagpraktismo. Mayat met ti agpraktis nga agsurat iti bukodmo a blog.

Amangan no kayatmo met nga ipablaak iti sangalubongan dagiti napipintas a buya ken pasamak iti lugaryo. Nagsayaaten ngay no maipagpannakkeltayo dagiti produktotayo–burnay, buneng, basi, dagiti makmakan–tupig, kas kada nagdadakkel a natnateng, uray ta bagnet! Makatulong pay daytoy iti turismo.

No adda piesta ken dadduma pay a pasamak dita lugaryo, mabalinmo pay ti agbalin a kasla citizen reporter. Babaen iti blog, kasla ka metten maysa a reporter di kadi?

Ania ngay ti suratem?

Daytoy ti aw-awaganda iti niche. Ania ti topiko a trataren ti blog-mo?

Kas koma diay blog ni mannurat a Roy Aragon: http://pinakbetrepublic.blogspot.com: puro makan nga Ilokano ti makitam sadiay. Gapu ta naglatak daydiay, agasem ta nasurok a 205,000 a LIKES-na iti Facebook?

Mabalin met a maipapan iti teknolohiya dagiti isuratmo, maipapan iti turismo, wenno maipapan iti trabahom. Diay bilingualpen.com ni Sherma Benosa, maipapan met iti Literatura. Social commentary ken naduma-duma a bambanag maipapan iti Ilocandia met diay topiko ti blog ni Propesor Herdy La Yumul: http://herdylayumul.com.

No mangaramidka iti blogmo, agpanunotka metten iti napintas a naganna–diay nalaka a lagipen ken maiparangarang diay kayatmo nga aramiden. No koma mangrugiak iti maysa a food blog, panaganak siguro iti “Narawet: Naiimas a Sida, Makan, ken Inumen.”

Sadinno ti pangaramidam iti blog?

Libre ti agaramid iti blog kailian. Saanmo a masapul ti agbayad. Adda la ketdi kompiutermo ken Internet connection-mo, mapanka iti aniaman kadagiti sumaganad a website tapno mangaramidka iti blog-mo.

Blogspot.com – Kukua ti Google, Inc. ti Blogspot. Maysa daytoy kadagiti kaunaan a blogging platform. Nalaka laeng nga usaren ken adu dagiti disenyo a pagpiliam. No kayatmonto ti maaddaan iti sangkabassit a pagsapulan babaen iti blog-mo, mabalinmonto ti ag-apply iti Google Adsense Advertising Program ti Google. Nalakanto laeng ti integration ti Adsense ken Blogspot.

(Wen, mabalinmo met a pagsapulan dagiti blog, ngem pagpatangantayonto dayta iti sabali a panawen.)

WordPress.com – Nalabit, daytoy WordPress ti kalatakan a blogging platform iti lubong ita. Panagkunak, nalaklaka nga usaren daytoy ngem iti Blogspot. Ad-adu pay nga amang dagiti theme wenno layout a pagpiliam.

Tumblr.com – Kasla nagmaymaysa a social network ken blogging platform daytoy Tumblr. Ti kaaduan a maiposte ditoy ket dagitay graphic arts. Makitam ditoy dagidiay nagkaadu a quotes a naikabil iti napintas a ladawan. Adda pay dagiti makunkuna a memes–wenno dagiti ladawan a namarkaan iti makapakatawa wenno sarcastic a balbalikas.

Adu pay dagiti blogging platform ita ngem dagitoy a tallo ti masansan a maus-usar. Mabalinmo met ketdi ti mangala iti bukodmo a domain name. Domain name ti awag iti address ti website nga i-type-mo iti browser, kas koma iti MightyRasing.com. Hosting met ti awag iti hard drive a pangikabilam iti files ti website-mo tapno mabisita daytoy dagiti tattao iti Web.

Makapadaringungo?

Wen, ta medyo teknikal ngamin daytoy. Ngem no la ketdi adda ekstra a PhP4,000-mo iti makatawen, mabalinmo metten a pagbalinen a personal website dayta blogmo kas iti pinamay-ak ditoy IlokanoRepublic.net.

Immuna a naipablaak iti Bannawag Magazine, Agosto 2014