Kasano ti Agdownload iti Online Video?

Ni mc rasing

Kurang ti panagaramat iti Internet no dika agbuya iti online videos. Naglatak ita ti YouTube, Vimeo, ken ti Facebook Videos. No dimo nabuya ti paboritom a teleserye, sapulem iti YouTube, adda ‘diay! Dagiti laban iti boksing iti kallabes a lawas, bulan, wenno tawtawen, makitam sadiay. Dagiti nagkauna a laban ni Pacman, mabalin a mabuya iti YouTube.

Siempre, dagiti agtutubo a mahilig iti music, sapulenda laeng dagiti idol-da a banda wenno singer, agkaiwarada sadiay–Katy Perry, Eraserheads, One Direction, ken dadduma pay. Adda met dagiti makunkuna a “cover musicians”–isuda man dagidiay nagaget nga agtokar iti kanta ti sabali a musician, ngem ikkanda iti bukodda nga areglo ken istilo.

Adu pay dagiti makaray-aw a video–Funniest Videos, comedy, ken no ania pay dita a makapakatawa a video–kas koma ken Bogart the Explorer, wenno dagitay feel-na-feel-da ti agkanta ngem sintunado met.

Segun iti Comscore, maysa nga Internet Analytics company, dandani tallo oras kada bulan ti average time a panagbuya dagiti Filipino iti online video. Kalatakan met kano nge Entertainment website ti YouTube ditoy pagiliantayo.

Saan laeng nga entertainment ti maalatayo iti YouTube. Adu dagiti tutorial videos a pakasursuroam. No kayatmo agluto iti makan dagiti French wenno Italian? Agsapulka iti YouTube! Agsursuroka nga ag-work-out iti gym? Adu dagiti fitness videos. Uray iti panagsursuro dagiti ubbing iti naduma-duma nga skills, adu ti mabuya ditoy.

Nupay nalaka laeng ti ag-access iti YouTube, mabalinmo met nga i-download dagiti pagaayatmo a video. Apay koma nga ag-download-ka iti online video?

Mabalinmo nga usaren a pagisuro. No maysaka a maestro wenno maestra, mabalin nga agdownload-ka kadagiti videos a makatulong kadagiti estudiantem. Siguradoem laeng a nga awan ti R-18 dagiti i-download-mo. Uray siak, no adda dagiti speaking engagement-ko, makatulong dagiti video tapno nalaklaka a maawatan dagiti agdengngeg kaniak dagiti napateg a paset ti mensahek. Uray dagiti papastor ken papadi, agusarda met itan iti video a makatukay iti rikna.

No awan internet-yo iti uneg ti balay ket adda video a kayatmo a sublian, mabalinmo met nga i-download manipud iti computer shop, wenno iti disso nga addaan wi-fi signal.

Kasano ngarud ti agdownload iti online video?

Adtoy man dagiti naduma-duma a web-based solutions a mabalinmo nga usaren.

YouTube Downloader. Maysa daytoy a desktop application. Mapanka iti http://bit.ly/youtubedownloader tapno maidownloadmo daytoy. No nayinstall-mon daytoy, alaem laeng ti URL ti youtube video a kayatmo nga idownload, ikabilmo iti YouTube downloader, piliem no sadinno pangi-save-am, ket i-convert-mon.

Keepvid.com. Maysa met a website daytoy Keepvid. Kas iti YouTube Downloader, alaem ti URL ti video a binuyam sa i-paste-mo iti espasio iti website. Saan laeng a YouTube ti mabalinmo pangalaan iti video, mabalin pay ti video nga aggapu iti Vimeo.com wenno Dailymotion.com.

Youtube-mp3.org. No dimo kayat a video ti i-download-mo, mabalin nga i-convert ti video iti mp3. Kastoy ti ar-aramiden dagiti agtutubo tapno maidownloadda dagiti pagay-ayat-da a musika manipud YouTube.

No nalpasen ti download, alaem dagiti files, iyakarmo iti smartphone wenno mp3/mp4 player-mo, ket mabalinmon a buyaen wenno denggen uray sadinno man a papanam.

Mangtedak laeng iti warning ken disclaimer. Aluadanyo laeng ti agi-download ken agi-upload kadagiti video wenno kankanta a saan a dakayo ti nangputar wenno nangaramid. Aglabsingkayo nokua ken ma-violate-yo ti copyright dagiti akin-kukua iti musika wenno video dagitoy.

Naipablaak iti Bannawag Magazine, Setiembre 1, 2014 a bilang