Kasano ti Mangisuro iti Lengguahe

Ni Rhoda P. Elizaga

Maysa ti lenguahe kadagiti di unay pagaayat dagiti estudiante nga adalen iti man primaria ken sekundaria. Iti laengen kaadu ti adalen dagiti ubbing nga ortograpia ken literatura manipud iti iseserrekda iti pagadalan a kas iti umuna a panangadalda itan iti nariingan a pagsasao a sarunuen dagiti dadduma a lengguahe a kas iti Filipino ken Ingles, dakkel unay a pakatiktikawan dagiti estudiante daytoy.

Dakkel a karit kadagiti mangisursuro iti lengguahe ta no dadduma kasla marikna ti adu nga estudiante a saan unay a napateg ti ortograpia ken literatura iti panagbiagda.

Kinapudnona, adu dagiti mangirasrason a dida met kasapulan ti husto nga ispeling ken ortograpia no agaramatda iti selpon a kangrunaan a gamigam a kankanayon nga iggemda.

Daytoy ti rason a maibalbalakad kadagiti mangisursuro iti lengguahe a maiturong koma kadagiti estudiante dagiti maisursuro kadakuada a saan ket a naiturong kadagiti leksion a kayatda nga isagana ken isuro.

Maiturong pay koma iti literatura ken dagiti istratehia ti panangisuro a maibasar iti kabaelan ken kasapulan dagiti amin nga adalanda.

Napateg unay para iti maysa a mangisursuro a mangammo iti pakabuklan ti klasena tapno maplanona a naimbag dagiti leksion a maitutop iti partikular a klase.

Nagduduma ti wagas a pannakaisuro dagiti nangatngato ti tukadna nga ubbing ngem dagiti adda iti babaenda.

Maibasar koma ngarud ti balabala dagiti leksion kadagiti kasapulan ti estudiante a saan ket nga iti kasapulan ti maysa a maestra.

Paliiwen koma ti maysa a mangisursuro no makipaset dagiti ubbingna kadagiti leksion nga isursurona.

Kadawyan ngamin a saan unay a makipartisipar dagiti ubbing kadagiti atiddog a lektiur ken saan a manamnama nga epektibo a makasursuroda babaen ti panagdengngegda lattan.

Masapul ngarud a naregta ken naidumduma ti panangisuro iti lengguahe tapno ad-adda met laeng nga aginteres dagiti ubbing kadagiti leksion.

Ken tapno mainsiar dagiti ubbing dagiti kayat nga isuro, masapul a mainaigda dagiti maisuro kadakuada iti pudno a biagda.

Padasen ngarud koma ti maysa a mangisursuro a guyugoyen dagiti adalanna a makipartisipar kadagiti proseso ti panagsursuro babaen ti panangdakamat kadagiti ubbing kadagiti diskusion ti klase, pananggrupogrupo kadakuada ken uray iti role playing.

No aramaten ti maysa a maestra ti literatura tapno maawis dagiti adalanna nga agbasa, ad-adda pay ketdi nga agbalin a managamiris dagiti ubbing ken ad-adda a maawatanda dagiti mayammo kadakuada a leksion.

Dakkel pay ti maitulong ti teknolohia tapno ad-adda nga epektibo ti panagisuro dagiti mamaestra iti lengguahe.

Babaen ti kompiuter a kas iti panangaramat iti Powerpoint, ad-adda a maparegta dagiti ubbing nga agadal iti lengguahe.

Naipablaak iti Bannawag Magasin, Agosto 4, 2014 a bilang.

image credit: Benedek Frank via Flickr