Ne Ania Met ti Podcast?

ni mc rasing

No dagiti inna nga agtagibalay wenno dagiti amma nga agtaltalon ti saludsodem no agdengdengngegda iti AM radio, nalabit “wen!” ti isungbatda.

Ngem no dagiti estudiante wenno agtutubo ti saludsodem, amangan no katawaandaka. Kasano ngamin, masansan nga FM stations ti denggenda wenno saan, ag-download-da lattan iti mp3 manipud iti Internet. No kayatmo ti agdengngeg lattan iti kankanta ni Taylor Swift, wenno ni Shakira, wenno Michael Buble, mabalin latta!

Malagipko la ketdi idi siak ti teenager ken kadisdiskubrek laeng iti FM station. Uray la irekordko dagitay kankanta a magustoak tapno mapatugtogko a kanayon.

Nupay adda istasion ti FM ti kaaduan a selpon ita, adu dagiti baro a programa a mabalin a mangngegan online. Timmaud dagiti aw-awagan ita iti podcast ken adda met dagiti Internet Radio.

Maysa nga audio program ti podcast. Naggapu daytoy iti pannakaiyababa ti iPod broadcast. Idi ngamin rinugian ti Apple, Inc. ti produktoda nga iPod, adu dagiti naay-ayo ta adu dagiti mangngegda a musika ken uray pay dagiti radio program a mabalin nga i-download.

Kas kadawyan dagiti bambanag iti web, naiyababa ngarud ti iPod broadcast ket nagbalin a podcast.

Mabalin a 5-minutos laeng ti maysa a podcast. Mabalin met a 30-minutos, ket adda met dagiti nasurok a maysa oras! Kasla atiddog aya? Ngem adu met latta dagiti agdengngeg. No idiligmo iti Internet Radio, maysa laeng a program ti podcast idinto a maysa a naan-anay nga istasion ti Internet Radio–adu dagiti programana ken adu dagiti mangngegam a musika wenno ania pay dita a broadcast.

Ti podcast, mabalinmo nga i-download iti Smartphone-mo, iti kompiutermo, wenno iti aniaman nga app nga us-usarem tapno agdenggeg iti podcast kas koma iti Apple iTunes wenno Android Stitcher.

Ala ket adtoy man dagiti sumagmamano a podcast a mabalinmo a suroten.

No kayatmo ti agbalin nga online freelancer ket rugiam metten ti panagpabaknangmo babaen ti Internet, rugiam ti agdengngeg iti Freelance Blend podcast ifi freelanceblend.com. Adut’ maadalmo maipapan iti trabaho a mabalin nga aramiden online.

Negosio? Nupay adu dagiti programa iti radio a mangtratar itoy a topiko, kanayon latta met nga in-demand daytoy. Denggem man la ti EntrePinas tapno mainspirarka met a mangrugi iti bukodmo a negosio.

Simple laeng ti wagas tapno mangngegmo dagitoy a podcast–idownload-mo ti iTunes wenno ti Stitcher App sa sapulem dagita podcast nga imbinsa-binsak dita ngato. Mayat ngamin ti agdengngeg iti podcast ta libre dagitoy, adu dagiti masursurom, ken adda pay dagiti maaramidmo kabayatan ti panagbiahe wenno panagatendarmo iti meeting.

Immuna a naipablaak iti Bannawag Magazine, Agosto 11, 2014 a bilang