Panagtutudo

Ni Jobert M. Pacnis

Gurruod a dumalagudog
Sikaw ti mangigkigtot
Agtarayak idiay kuartok
Agawaak ti agkumot.

Kimat nga agkarakidmat
Uray la masisirapak
Aglawlaw nakalawlawag
Ay, mabutbutengak.

Tudo a bumayakabak
Mangtinep iti tambak
Ti Dios Apo, pagyamanan
Ni Tatang makapagmulan.

Uong idiay bunton nagtubo
Pag-utenmi ken adingko
Dengdengen ni nanangko
Agigupkami iti digo!

 

Naipablaak iti Bannawag, Agosto 4, 2014 a bilang.

image credit: Eugene Triguba via Unsplash